(1962) Ronda del Cébranu
Virxina del Cébranu, amor míu,
¿T'enoxarás si sal ruina mieu canción?
Florecinas del prau, ecu del ríu,
¡Audiáime! me lu pide'l corazón.
¡Dame tou flauta, mirlu xiblador,
Quieu cantar a la rosa más hermosa
Que xuntu a Sobia miedra primorosa,
Rondas astures, cánticos d'amor!
Na aldea ya un puru traxinar
la víspora de un día tan siñaláu:
barrer, llimpiar cacíos, empapelar
desfuelle del llanar sacrificáu
ya puener los garbanzos a remochar.
Quince d'agostu, cuando'l gallu canta.
Anguién na coucina bulle ya da pasos:
ya l'anxel previsor, ma bona ya santa,
sacrificiu ya altar en todos los casos
que delantre l'aurora se llevanta.
Será, pos, la tarea más que dura
servirá arroz con lleiche, mantecaos,
borrachinos de tan nidia dulzura,
que fairán antroxar a los convidaos
ya rellambese al bonu'l siñor Cura.
Insistentes repican las campanas,
llueu se cumplirá cálida promesa:
contemplái cuánta xente en caravana,
caminando gozosa, a toda priesa
ellos apuestos, ellas mui galanas.
La misa ya'l sermón fairán llorar,
la gaita empresta vuelu al corazón
sobre floridas andas van sacar,
trabaos mozos, la Santa en procesión
pa que la xente puédala aclamar.
Xuben al cielu raudos voladores,
a la Santina vivas, muchos beisos,
llágrimas protestando mil amores
ufriendo escanda, maíz, queisos...
tanto beatos como pecadores.
Llevántanse nel medio d'El Campal
douce ramos mariellos ya coloraos,
lluciendo panes con cadarzu ataos,
nun ya borona, sí trigu candeal
dau por romeiros llibres d'angún mal.
Val la pena escuchar al mayordomu
rifar entusiasmáu guapa xatina,
más que tarrala creise novia ou cromu
con sous llazos pintaos, llueca nuevina,
sin muñica na piel, nidia de llombu.
Arrudichaos delantre la Santina,
mucheres, homes, xóvenes piadosos,
van pueniéndose, a modo de boína,
pa llibrase de males dolorosos,
la milagrera ya santa caldeirina.
La fiesta mañanera lliega al fin;
estallan en flor postreiros cobetes,
los ufricíos emprienden el camín
ou xúntanse nos praos con sous paquetes
pa manducar ya echar angún culín.
Las Rallas ya Pilara de Probaza
vienden ablanas, trompas, restallones...
andan guaxes ya grandes, a la caza
que llevarán como perdones
pa la madre ya tamién pa la rapaza.
Fai calor. El Campal fierve de xente,
flor nel oxal los mozos van ya vienen
magostaos por el sol, l'aire de monte,
echando ixuxús claros ya que tienen
olor a yerba, música de fonte.